9.5 C
Zürich
Dienstag, November 17, 2026

«Trojet» e «Rinia» vallëzuan e kënduan së bashku në Winterthur

Me të intonuar të hymnit kombëtar e shtetëror, në skenë njëri pas tjetrit defiluan vallëtarët e dy grupeve artistike, të dy grupmoshave, duke i dhënë një kolorit ambientit dhe kënaqësi publikut i cili edhe i priti me shumë përzemërsi.

Teksti e fotot : Rexhep Rifati

Derisa në Kosovë edhe më tej mbretërojnë dilemat të festohet apo të demonstrohet, mërgata shqiptare në Perëndim është përcaktuar thuaja se në tërsi për të shënuar në mënyrë sa më masive dhe cilësore 8-vjetorinë e pavarësisë së shtetit të Kosovës. Për këtë qëllim janë mobilizuar me dhjetra grupe, shoqëri e ansamble artistike, që për kah niveli i interperetimit, nuk u mbesin shumë mbrapa simotrave të tyre në trojet etnike.

Madje festat janë aq të shumta sa ndodh që në një sallë të defilojnë edhe nga dy-tri grupe artistike. Kështu më 13 shkurt në Hotel Töss në Winterthur, të kantonit të Cyrihut  bashkarisht shfaqen një program tejet mbresëlënëse ansamblet “Trojet”, në përgatitje të koreografit Arsim Berisha  dhe «Rinia» nga Spreitenbachu, në koreografi të Sherif Dakajt.

Me të intonuar të hymnit kombëtar e shtetëror, në skenë njëri defiluan vallëtarët e dy grupeve artistike, të dy grupmoshave, duke i dhënë një kolorit ambientit dhe kënaqësi publikut të shumtë, i cili edhe i priti artistët të ri e të vegjël me shumë përzemërsi.

Puna nuk ngeli vetëm tek grupet artistike, por edhe tek nikoqiri e përfaqësuesit e Republikës së Kosovës, të cilët po ashtu përshëndetën të pranishmit. Në emër të nikoqirit, kryetari i ansamblit «Trojet», Zeqë Gashi, të familjeve të dëshmorëve Agim Pajaziti, vëllai i hero Zahir Pajazitit, të Konsullatës së Republikës së Kosovës, Islam Spahiu, konsull në Cyrih dhe në emër të Ministrisë së Diasporës, drejtuesja e Qendrës së Kulturës në Cyrih, Shukrije Ramadani.  Me këtë rast ata shprehën kënaqësinë, që pavarësisht gjendjes në Kosovë, këtu po festohet, pasi mërgata jonë si askush tjetër është e lidhur me fatin e atdheut, për të cilin ka dhënë të gjitha format e ndihmës deri në sakrificë.

Programi i cili u moderua nga Martela Ujka dhe Sovran Shala, pati një rrjedhë tërheqëse, të përshkuar me një program solid të përzgjedhur mirë nga ana e organizatorëve e koreografëve, nergut për këtë festë tonë kombëtare. Por. ajo që e çrregulloj në masë ecurinë ishte pjesa teknike, zërimi,  që u shkaktoi mjaft telashe grupeve dhe pati ndikim të dukshëm edhe në cilësinë e programit.

Pasi që një pjesë e mirë anëtarëve të këtyre grupeve ishin nxënës të mësimit plotësues, atyre iu bashkua, pas valleve edhe një grup i nxënësve të shkollës shqipe me ca recitime e këngë.

Siç është bërë zakon gjatë festave të kësaj natyre, edhe kësaj radhe ishin ftuar këngëtarë mysafirë, për ta plotësuar pjesën e fundit të programit, atë argëtuese me këngë e vallëzim të përbashkët. Kësaj radhe merrnin  pjesë këngëtarja Fahrije Zogaj dhe këngëtarët Mentor Mushkolaj, vëllezërit Patrik dhe Florenc Zejnullahu.

Për dallim nga programet e disa shoqërive, hyrja për të gjithë pjesëmarrësit ishte falas, ndërsa që gratë shqiptare kishin sjell ushqime të shumta tradicionale që shiteshin me çmime simbolike, sa per ti mbular shpenzimet e rastit.

Ajo që e bënë ketë program të veçantë është se kësaj radhe u paraqitën dy grupe artistike, falë nisiativës së koerografit Arsim Berihsa , por edhe gatishmërisë së koreografit dhe udhëheqësit të grupit «Rinia», Sherif Daka.

Po kësaj mbrëmje festuan kështu edhe shoqëritë «Bashkimi» në Ushter, «Sharri» në Romanshorn e të tjerë. Por në pamundësi per ti përcjell të gjitha, kësaj radhe u përcaktuam për këto dy trupa me mjaft perspektivë, jo vetëm për shkak të koreografëve të palodhshëm e të talentuar, por edhe gatishmërisë së prindërve për ti angazhuar fëmijët e tyre në grupe shqiptare, madje duke i paisur me kostume e instrumente gjegjëse. Vërtetë një përkushtim dhe një angazhim që meriton çdo lavdatë.