Gjatë një vizite në Fribourg, mësuam se numri i studentëve shqiptarë në këtë kanton ka arrit në rreth 200, duke e zgjeruar kështu edhe hartën studentore, ndaj edhe më 31 tetor 2015, do të mbahet Konferenca e parë e Federatës së Shoqatave të Studentëve Shqiptarë në Zvicër
Teksti dhe fotot: Rexhep Rifati
Shoqatës e Studentëve Shqiptarë të Fribourg-ut (AEAF- SHSSHF), ndonëse një shoqatë e re studentore nga viti në vit po e thellon aktivitetin e saj, jo vetëm në nivel lokal por edhe më gjerë sa i përket bashkëpunimit me shoqatat tjera studentore shqiptare në Zvicër. Kështu, më 2 tetor, në kuadër të fillimit të vitit akademik 2015/16, kjo shoqatë organizoi një mbrëmje shoqërore – muzikore, në të cilën ishin ftuar studentë- mysafirë edhe nga Universiteti i Bernës dhe Universiteti i Cyrihut.
Në mesin e mysafirëve të ftuar, kësaj radhe isha unë edhe në cilësinë e gazetarit të portalit transnacional.ch, ndaj edhe për mua ishte kënaqësi e veçantë që për disa orë ti kaloj disa çaste të mrekullueshme në ambientin që kishin krijuar këta studentë shumë fisnik e bujar. Nga një bashkëbisedim me anëtaret e kryesisë së Shoqatës së Studentëve Shqiptarë të Fribourg-ut mësojmë se nga viti në numri i studentëve shqiptarë në këtë universitet dhe shkollat e larta të këtij kantoni është vazhdimisht në rritje. Sipas evidencës së për afërt që ka kryesia e kësaj shoqata, numri i studentëve shqiptarë sillet nga 180-200 studentë, ndërsa që numri më madh i tyre janë student në ekonomik apo juridik.
Përndryshe, kryesia e kësaj shoqate, dallon nga ato të shoqatave tjera studentore shqiptare, pasi ajo nuk ka kryetar, por të gjithë anëtarët e saj kanë një status të njëjtë dhe punojnë kolektivisht. Aktualisht kryesinë e SHSSH e përbëjnë: Ardian Xhigolli, Hana Jakupi, Rilind Ajeti dhe Kujtim Memedoski. Ndërkaq anëtari i deri tashëm Visar Vela, një nga anëtarët shumë aktiv, është liruar nga detyra e anëtarit të kryesisë, pasi studimet aktualisht është duke i vazhduar në Universitetin e Bernës, por në shenjë falënderimi për punën e tij të deritashme gjatë kësaj mbrëmjeje iu dha një dhuratë simbolike.
Në cilësinë e mysafireve nga kryesua e shoqatës së studentëve shqiptarë të Universitetit të Bernës merrnin pjesë studentet e juridikut Emsale Selmani dhe Valmire Avdiji, nga të cilat mësuam se numri i studentëve shqiptarë në Universitetin e Bernës tashmë kalon më se 100 e sa studentë shqiptarë. Ndërkaq si mysafire nga Shoqata e studentëve shqiptar “Studenti” të Universitetit të Cyrihut, ishte kryetarja e shoqatës, Arbnora Aliu, e cila për portalin tonë deklaroi se në Cyrih në kuadër të fillimit të vitit te ri akademik, u organizua një pritje, ku morën pjesë mbi 30 studente e studentë të ri.
Në këtë mbrëmjen studentore merrnin pjesë edhe maturant gjimnazesh, por edhe studentë të diplomuar deri edhe docent fakultetesh. Në mesin e mysafireve si zakonisht edhe kësaj radhe nuk mungonte Dr. Math. Driton Komani, docent i lindës së matematikës në Bernë dhe Biel/Bienne, pastaj Burim Ramaj, asistent në katedrën e së drejtës fetare, aktualisht doktorant mbi tematikën e kanunit, Yll Deari , student i shkallës master në informatikë, Gëzim Amiti po ashtu student në informatikë. Por ajo që ra në sy edhe në këtë tubim rinor-studentor ishte prania e dukshme e femrave, thuaja se gjysma e tyre. Është kjo edhe një dëshmi se nga viti në vit po shtohet numri i femrave shqiptare në universitetet dhe shkollat e larta të shtetit helvetik.
Kjo prani prej rreth 50 studentësh shqiptarë në një mbrëmje shoqërore, tregon sesi po zgjerohet gjeografia e shoqatave studentore shqiptare në mbarë Zvicrën. Ndaj edhe në këtë tubim u bë e ditur se më 31 tetor 2015, do të organizohet Konferenca e Federatës së Shoqatave të Studentëve Shqiptarë në Zvicër, në kuadër të së cilës do të përfshihen e veprojnë shoqatat e studentëve shqiptarë të Universiteteve të Cyrihut, Bernës Sat Gallenit, Gjenevës e të tjerë.
Mbrëmja e organizuar nga studentët në Fribourg u përshkua me një atmosferë gëzimi e hareje, ku mbretëroi vallëzimi, këndimi e humori. Nuk munguan as dhuratat simbolike për studentët e ri. Me një fjalë, nga përshtypja e parë që fitohet në mesin e këtyre studentëve mund të thuhet se studentët shqiptarë në Fribourg, tashmë janë një shembull i mirë si në studime ashtu edhe në aktivitete. Si dëshmi është edhe fakti se prej vitesh nga Universiteti e Fribourg-ut, kanë dalë të diplomuarit e parë shqiptarë, të cilët shquhen edhe si ekspertë fushash të ndryshme. Me këtë rast Shoqatës së Studentëve Shqiptarë të Fribourgut ia dhurova librin “Shqiptarët në Zvicër- 1001 pamje”. Po ashtu një libër të tillë ia dhurova edhe Doktorit të shkencave matematikore, Driton Komani, i cili është ndër miqtë më të afër të shoqatave studentore shqiptare dhe i cili në nismë të themelimi të Shoqatës “Studenti” të Universitetit të Cyrihut ishte edhe kryetar shoqate.













































