10 C
Zürich
Dienstag, November 17, 2026

Ne zbulojmë talentin e fëmijëve tuaj

Amar Telai: Fëmijët tanë e meritojnë më të mirën, dhe ne jemi përgjegjës për t’ua mundësuar atë!

Ka më shumë se një vit që në Shkup është themeluar qendra e parë edukativo-arsimore joformale SkyLab. Bashkëthemeluesit Amar Telai, Besar Rufati, Adem Alili dhe Zekerija Memishi sot ndihen krenar dhe të motivuar: në programet edukative të SkyLab deri më sot kanë absolvuar 220 fëmijë të moshave të ndryshme (6-14 vjeç). Aktualisht në SkyLab janë mbi 150 fëmijë aktiv të cilët i ndjekin programe të rregullta. Bisedën e zhvilluam me Amar Telain, nismëtar dhe bashkëthemelues i këtij institucioni të rrallë edukativ i cili në mënyrë të detajuar na e shpjegon qëllimin.

Transnacional.ch: Themelimi, ideja, arsyeja dhe motivi
Amar Telai: Qendra SkyLab është themeluar në nëntor të vitit 2022, ndërsa veprimtaria e saj de facto ka filluar në fund të shkurtit, gjegjësisht 22 shkurt 2023. SkyLab – arsyeja e emërtimit të qendrës tonë me emrin SkyLab ka qenë duke u bazuar se qielli është i stërmbushur me yje që jo rrallë herë ne shërbehemi me to për të na orientuar në momente të caktuara, kësisoj fëmijët të cilët vijnë në qendrën tonë, janë yjet tonë, orientimi jonë i së ardhmes. Ndërsa termi «Lab» është përdorur ngase Lab përdoret si akronim i fjalës Laboratori, ndërsa në laboratori bëhet përpunimi i gjërave, rrjedhmisht NE I PËRPUNOJMË YJET (nxënësit), i zbulojmë talentet e tyre dhe ua komunikojmë prindërve.

Bashkëthemeluesit Amar Telai, Besar Rufati, Adem Alili dhe Zekerija Memishi
Bashkëthemeluesit Amar Telai, Besar Rufati, Adem Alili dhe Zekerija Memishi

Qendra SkyLab është qendra e parë edukativo-arsimore joformale në Shkup e cila si implementim të saj ka programin internacional dhe interdisiplinar STEM (Science, Technology, Engineering, Math). Të motivuar nga gjendja e rëndë ekzistuese në vend, dhe realiteti i brishtë i të rinjve, vlerësuam se hapja e një qendre të tillë do të kontribuonte në zbutjen e këtij realiteti dhe njëkohësisht do të zëvendësoheshin trendet aktuale me koncepte të shëndosha. Krejt çfarë synon SkyLabi është t’u ofrohet fëmijëve një ambient inovativ, kreativ dhe inspirues dhe njëkohësish mësimet të cilat i marrin aty, t’ua ndriçojnë jetën e tyre të përditshme.

SkyLab si institucion i pavarur, kahja pozitive

SkyLab është organizatë joqeveritare jo-fitimprurëse. Gjithsej nga momenti i fillimit të veprimtarisë, pra me 22 shkurt 2023, e deri më sot 01.10.2023, në SkyLab kanë frekuentuar më tepër se 220 fëmijë, ndërsa aktualisht në SkyLab janë mbi 150 fëmijë aktiv të cilët i ndjekin programet tona të rregullta. SkyLab programet të cilat i disponon i përfshinë fëmijët nga mosha 6 deri në moshën 14 vjeçare. Nxënësit paraprakisht nuk duhet të plotësojnë ndonjë kriter të posaçëm për të qenë pjesë e SkyLab-it, i vetmi parakusht ndoshta do të ishte motivi dhe dëshira për të mësuar.

𝗤𝗲𝗻𝗱𝗿𝗮 𝗦𝗞𝗬𝗟𝗔𝗕 𝘁𝗮𝘀𝗵𝗺𝗲̈ 𝗲 𝗮𝗸𝗿𝗲𝗱𝗶𝘁𝘂𝗮𝗿 𝗻𝗴𝗮 𝗦𝗧𝗘𝗠.𝗼𝗿𝗴

Programet praktikuese, rrjedhja mësimore, kushtet

Meqë programet tona janë programe inovative, rrjedhimisht edhe mësimet dhe mjetet të cilat përdoren në qendër janë po ashtu inovative dhe tejet argëtuese. Veçantia e SkyLab-it, krahas mjeteve, pajisjeve dhe ambientit inovativ e kreativ, është edhe ajo se pjesa dërmuese, ose më mirë të themi 80% e mësimeve janë mësime pragmatike gjegjësisht të fokusuar në eksperimente, interaktivitet dhe punë reale. Fëmijët si asnjëherë më parë do ta kenë mundësinë që ta «prekin» shkencën, ta jetësojnë kiminë, të bashkëveprojnë me ligjet e fizikës dhe fenomenet e ndryshme natyrore, krejt kjo, falë teknologjisë së fundit të implementuar të AR (augmented reality) dhe VR (virtual reality).

Krahas investimit të madh që kjo qendër ka bërë me qëllim që fëmijëve t’u krijohen kushtet më ekskluzive për mësim, fëmijët participojnë me një shumë simbolike, dhe kjo shumë realizohet në muaj ose kryhet participimi për një nivel, varësisht gjendjes financiare të familjeve.

Mbështetja institucionale

Mbështetja institucionale për hapjen e kësaj qendre ka qenë simbolike, jo ndoshta sa e meriton, por shpresojmë në një të ardhme të afërt të krijohen kushte për një bashkëpunim të tillë, momentalisht jemi në fazën përfundimtare të përgatitjes së një memorandumi të bashkëpunimit me disa shkolla publike dhe ato private, që fëmijët e këtyre shkollave të vijnë në SkyLab dhe t’u prezantohen mundësitë të cilat kjo qendër ua ofron të gjithë nxënësve.

Pengesa byrokratike (taksa, kushtet) që hasen

Sa i përket problemeve apo pengesave institucionale, fatmirësisht nuk kemi pasur ndonjë problem, mbase i plotësojmë të gjitha kushtet dhe standardet për të funksionuar në mënyrën më të mirë dhe pa probleme, por nga ana tjetër ligjet në Republikën e Maqedonisë së Veriut për organizatat joqeveritare janë shumë tolerante dhe shteti në vija të trasha i përkrah pothuajse të gjitha OJQ-të, por në rastin tonë nuk kemi hasur në përkrahje materiale apo përkrahje tjera relevante. Projekti i SkyLab-it është realizuar me bashkëpunimin e kompanive vendase të cilat pa hezituar kanë qenë të gatshëm për të investuar në projekte kapitale shoqërore dhe kësisoj vazhdojnë të jenë aq energjik për të vazhduar ky projekt.

Mbështetje joshtetërore (nga persona fizik)

Një pjesë e konsiderueshme e të ardhurave në SkyLab janë donacion, me ç’rast SkyLab-i realizon edhe të ardhura të veta të cilat bazohen në veprimtarinë e saj, por parimisht meqë jemi OJQ jo-fitimprurëse, shuma e cila gjenerohet nga veprimtaria është simbolike.

Jetëgjatësia e kësaj shkolle, degëzimi i saj

SkyLab-i sot numëron de jure 11 muaj, ndërsa de facto 7 muaj veprimtari. Kemi pasur kërkesa për zgjerim edhe në qytete tjera, gjegjësisht kanë kërkuar franshizën tonë, mirëpo meqë ende jemi në periudhë të hershme të zhvillimit, marrja e vendimeve të tilla mbase do t’ishin të kushtueshme, rrjedhimisht temën e zgjerimit edhe për këtë vit nuk do e diskutojmë, por gjithsesi nga viti i rradhës do të fillojmë të hartojmë plane edhe në qytetet tjera të RMV, dhe jo vetëm.

Pse pikërisht këto trajnime

Si rezultat i hulumtit tonë paraprak, më saktësisht 1 vit e 2 muaj, të gjithë jemi bindur se qasja e nxënësve në fushat ekzakte apo lëndët e drejtimeve natyrore është shumë e varfër dhe si rrjedhojë duhet përmirësuar. Hulumtimi i tillë është realizuar në bashkëpunim edhe me arsimtarë dhe profesorë të shkollave të mesme, ku ata kanë shprehur indinjatën e tyre rreth dekadencës së këtyre lëndëve gjegjësisht fizikës, kimisë, matematikës, biologjisë e kështu me radhë. Këtë realitet të dhimbshëm e morëm ne përsipër për të kontribuar për ta përmirësuar, dhe deri tani, me këtë numër të vrullshëm të nxënësve jemi optimist se ndryshimi vetëm se ka dhënë shenjat e para të saja.

Programimi, zhvillimi si dhe ‚diplomimi‘

Çdo program në SkyLab zgjat më tepër se 1 nivel, gjegjësisht për çdo nivel zgjat 4 muaj, fëmijët në fund marrin certifikatat për njohuritë e nxëna në programin përkatës. Meqë tashmë është formuar gjenerata e II e nxënësve, jemi në zhvillim e sipër për një vizitë ekskluzive të nxënësve në një nga qendrat më të mëdha të Turqisë përsa i përket STEM programit. I kemi nisur kontaktet e para me këtë institucion të madh të Turqisë, andaj gjërat po shkojnë me tempo të ngadaltë, shpresojmë në një të ardhme të afërt të realizohet edhe kjo shëtitje ku ndoshta do i kalonte edhe dimensionet e vetë shëtitjes.

Nëse jo ekzakt ky trajnim, çka tjetër?

Nëse nuk do të ishte SkyLab-i, me siguri do të planifikoja diç të ngjashme me SkyLab-in, por nuk është se do t‘isha larguar nga kjo ide dhe bindje se, fëmijët e meritojnë më të mirën, andaj ne jemi përgjegjës për t’ua mundësuar atë!

Amari (në mes) dhe Besari (djathtas) ndajnë çertifikatën për nxënsen e shkëlqyeshme Enfan Bushi

Një mesazh përcjellës për rinjët

Mesazhi im për të gjithë ata të cilët do ta kenë mundësinë ta lexojnë këtë intervistë është: Mos të lejojmë që shpresat t’i pikturojmë në imagjinatë. Burimet e suksesit tonë duhet të gjenden brenda kulturës tonë, andaj të kontribuojmë gjithë së bashku për formësimin mirëfilli të ardhmërisë së shqiptarëve. O tash, o kurrë!  / Transnacional.ch, Shkup 29.09.2023


Na telefononi ose na vizitoni:
Telefoni: +389 72 255322
Hristijan Todorovski – Karposh Nr. 86, 1000, Shkup

https://skylab.mk/
https://www.facebook.com/skylabcenter
https://www.instagram.com/skylab.mk/