12.4 C
Zürich
Dienstag, November 17, 2026

Frymë e pavdekshme e letrave shqipe, mbrëmje nën dritën e Ismail Kadaresë

Mbrëmja Kulturore në nder të Ismail Kadaresë mblodhi krijues dhe diplomatë në Luzern  të Zvicrës

Shkruan: Bardhec Berisha – Bardhi

Të shtunën më 19.10. 2024 në bibliotekën e shoqatës humanitare Nënë Tereza në Luzern (Zvicër) në një atmosferë mbresëlënëse u organizua mbrëmja përkujtimore “Pas lamtumirës” (Post Mortem), kushtuar shkrimtarit të madh shqiptar Ismail Kadare.

Në ketë mbrëmje të titulluar “Kadare: e pavdekshmja letrare, si dhe nderi dhe zëri i kombit” u përkujtua jeta dhe vepra e Kadaresë, një prej ikonave më të mëdha të letërsisë botërore dhe shqiptare. Pas mbajtjes së një minutë heshtje në nderim të jetës dhe veprës së Ismail Kadaresë, zonja Hava Kurti – Krasniqi, moderatore, përshëndeti të gjithë të pranishmit.

Në këtë ngjarje të veçantë morën pjesë anëtarë të trupit diplomatik shqiptar, si dhe një numër i madh dashamirësh të fjalës së shkruar, përfshirë shkrimtarë dhe krijues të ndryshëm shqiptarë, por edhe zviceranë. Mbrëmjen letrare më fjalën hyrëse dhe përshëndetëse e hapi kryetari i shoqatës Nënë Tereza, Nue Zalli.

Këtë manifestim kulturorë në emër të ambasadës së Shqipërisë e përshëndeti diplomati Valon Gashi, kurse në emër të ambasadës së Kosovës diplomatja  Makfire Azemi. Më pjesëmarrjen e tij këtë mbrëmje e nderoi dhe e bëri edhe ma madhështor edhe Dr. don Anton Uka, misionar i misionit katolik shqiptar në Luzern.

Gjatë mbrëmjes u lexuan kumtesa nga shkrimtarët pjesëmarrës, të cilët ndanë mendimet e tyre mbi ndikimin e jashtëzakonshëm të veprës së Kadaresë në kulturën dhe historinë shqiptare.

Më kumtesat e tyre u paraqitën shkrimtari z. Ndue Ukaj, mysafirë nga Kosova, më kumtesën e tij të titulluar: “Ismail Kadare: kryqëzime letrare dhe kulturore.”  Shkrimtari zviceran z. Pabllo Haller  më kumtesën e tij: “Den Überwachenden überwachen”, shqip “Vëzhgimi i të vëzhguarit”. Kurse shkrimtari z. Musa Jupolli është bashkëveprues (Francë) i I. Kadaresë më punimin e tij: Ismail Kadare në mërgim.  Veprimtari dhe kryetari i Shoqatës së Intelektualëve Shqiptar në Zvicër, z. Abas Fejzullahi prezantoj punimin e tij: Veprimtaria e Ismail Kadaresë në shërbim të kulturës dhe diplomacisë, Referuesi i fundit ishte nikoqiri i kësaj mbrëmje përkujtimore, shkrimtari, z.Bardhec Berisha- Bardhi i cili referoi me temën: „Identiteti evropian i shqiptarëve: apo Rrënjët perëndimore të shqiptarëve.

Nën tingujt e flautes ekzekutuar nga motrat Morena dhe Puhiza Shala dhe të poezive të Kadaresë mbrëmja u bë edhe ma madhështore.

Mbrëmja kulturore u moderua me profesionalizëm nga zonja Hava Kurti – Krasniqi, duke krijuar një rrjedhë të harmonishme dhe të angazhuar të diskutimeve dhe leximeve.

Kjo mbrëmje u shqua jo vetëm për përmbajtjen e pasur kulturore, por edhe për frymën e bashkimit të komunitetit krijues dhe atij diplomatik, duke krijuar një platformë reflektimi mbi trashëgiminë e pavdekshme të Ismail Kadaresë.

Pas diskutimeve, të ftuarit u bashkuan për një apero të përbashkët, ku vazhduan bisedat në një atmosferë të relaksuar dhe miqësore, duke shkëmbyer ide mbi letërsinë dhe trashëgiminë kulturore, por edhe mendime tjera, të jetës së përditshme.