14.5 C
Zürich
Dienstag, November 17, 2026

Flamuri e poezia bashkuan shkrimtarët e mërgatës në Cyrih

Mbi 20 shkrimtarë shqiptarë që veprojnë në Evropë, u tubuan në një festival të përbashkët të leximit letrar, ku u nda për herë të parë edhe Çmimi “Ismail Kadare” – Hero Agim Ramadani, figurë poliedrike në fushën e artit, anëtar nderi i Shoqatës së Shkrimtarëve të Gjermanisë,

Teksti dhe fotot: Rexhep Rifati

Festa e Flamurit, si rrallë më parë u shënua në mërgatën shqiptare me shumë manifestime. Edhe në Zvicër, si edhe viteve të mëparshme pati shumë manifestime, por ajo që e veçoi festën tonë kombëtare kësaj radhe ishte Festivali i leximit letrar dhe prezantimit artistik. E veçanta e këtij evenimenti kulturor ishte se kësaj radhe nën tingujt e vargut poetik u tubuan dhjetëra krijues të letrave tona që jetojnë e veprojnë në shtet perëndimore, përfshi këtu edhe Kroacinë. Bashkë me poetët dhe prozatorët tanë filluar nga Zvicra, Gjermania, Suedia e Kroacia ishin edhe piktorë e skulptorë shqiptarë që krijojnë në Zvicër.

E rëndësishmja dhe e veçanta ishte se ky takim letrar, u organizua përherë të parë nga Shoqata e Krijuesve Shqiptarë në Zvicër, që drejtohet nga Besnik Camaj dhe Qendra Kulturore e Kosovës, që drejtohet nga Shukrije Ramadani. Manifestimi filloi pikërisht në 102 vjetorit e shpalljes së Pavarësisë së Shqipërisë, më 28 Nëntor. Tubimi nisi me një ekspozitë dhe aperitiv, vazhdoi me lexime letrare, muzikë me kitarë, përurim librash, ndarje çmimesh, ndarje vlerënjohjesh dhe përfundoi me bashkëbisedime mes pjesëmarrësve gjatë aperitivit.

Më poshtë, programi i Festivalit të leximit letrar dhe prezantimit artistik me 28.11.2014 në Cyrih në lokalet e Qendrës Kulturore të Kosovës – QKK, hartuar nga ana e vet organizatorit:

Në këtë mbrëmje, në lokalet e ngushta për karakterin e këtyre tubimeve, një pjesë e të cilave u mbajt në ambient e Konsullatës së Kosovës, në emër të nikoqirit përshëndeti drejtuesja e QKK-së, Shukrije Ramadani. Një përshëndetje dhe një urim të ftuarve të shumtë ua drejtoi konsulli i Kosovës në Cyrih, Salih Sefa. Ndërkaq me një fjalë rasti , hapjen e ekspozitës së punimeve artistike nga piktorë dhe skulptorë të Shoqatës së Artistëve Figurativë, e bëri skulptori Nexhmedin Junuzi.
Krahas tablove të pikturave edhe ato poetike

Ndërkaq pjesa tjetër, që ndërlidhej me manifestimin letrar, e udhëhoqi shkrimtarja nga Suedia, Saranda Iseni, meqë rast me nga një përshëndetje të pranishmëve iu drejtuan Besnik Camaj (udhëheqës i shoqatës së krijuesve shqiptar në Zvicër); Hasan Qyqalla(nga shoqata Gjermani, në cilësinë e kryetarit të LKSHM-së) dhe Hysen Ibrahimi nga pozita e kryetarit të shoqatës së krijuesve në Suedi.

Ambientin e bënë pos vargjeve edhe më relaksues tingujt e kitarës së nxënëses mysafire nga Gjermania, nxënësja Nora Selca. Ndërkaq me lexime letrare, para artdashësve të pranishëm, u prezantuan autorët: Shemsi Makolli, Sevëme Fetiqi, Miradie Maliqi, Hasan Qyqalla, Brahim Avdyli, Bujar Salihu, Shukrije Ramadani, Gani Bytyçi, Rehana Doko, Bardhec Berisha. Për pak minuta me një skeç, mini-shfaqje teatrale ndërhyni grupi « Aktrimi » i Cyrihut. Sërish u vazhdua me lexime letrare. Kësaj radhe nga autorët: Saranda Iseni, Besnik Camaj, Drita Binaj, Shenida Bilalli, Fatmire Zenelaj, Muharrem Blakaj, Shaip Beqiri, Haki Bunjaku Ahmet Osmani dhe Fetah Bahtiri

Rehana Doko fituese e Çmimit “Ismail Kadare”

Sihariq në vete në këtë mbrëmje ishte edhe ndarja e Çmimit «Ismail Kadare» për autorin më të suksesshëm shqiptar të gjeneratës së re në 3 vitet e fundit në Zvicër. Dhe kjo nuk ishte edhe befasi, sepse një të tille të kësaj gjenerate, është vështirë ti gjendet shoqja, pos autores Rehana Doko, një gjimnaziste të shkëlqyeshme të gjimnazit të Lucernit, aktualisht studente të Universitetit të Bazelit.
Ky manifestim letrar u përshkua edhe me përurimin e 3 vëllimeve të «Thesarit Kombëtar» të Shoqatës nga Suedia , për të cilat shkurtimisht referuan Brahim Avdyli dhe Besnik Camaj. Në emër të Shoqatës së krijuesve në Zvicër, Besnik Camaj, ndau disa mirënjohje për shoqatat simotra në Evropë.

Shkrimtarët edhe në manifestimin e Amriswillit

Shkrimtarët nga mërgata ishin pjesëmarrës edhe në manifestimin e radhës, një natë më vonë edhe në manifestimin grupeve artistik në Amrswill: Me këtë rast kryetarët e tri shoqatave nga Zvicra, Gjermania e Suedia përshëndetën të pranishmit e shumtë në sallë dhe ua uruan Festën e Flamurit. Me këtë rast, Hasan Qyqalla, në emër të Lidhjes së Shkrimtarëve, Artistëve dhe Krijuesve Shqiptarë në Gjermani, lexoi vendimin e kësaj shoqate me motivacion: që Bardin e Mërgatës shqiptare, Agim Ramadani ta shpallë anëtarë nderi, post mortum, për veprimtarinë e tij poliedrike në fushën e artit, veprimtarinë ushtarake dhe atë kombëtare. Momenti i dorëzimit të kësaj mirënjohjeje, bashkëshortes së hero Agimit, zonjës Shukrije Ramadani, sa i dhemshëm aq edhe krenar, u prit me duartrokitje nga qindra të pranishëm në sallë. Gjatë dorëzimit të këtij vendimi, në mesin e familjes Ramadani, ndodhej edhe vet nipi gati njëvjeçar i heroit, Agimi, që ka trashëguar emrin e gjyshit të martirizuar për lirinë dhe pavarësinë e Kosovës.

Edhe organizatorët e manifestimit të madh në Amriswill, nuk lanë pa një mirënjohje shkrimtarët mysafir: një buqët lulesh në emër të tyre iu dhurua regjisores së mirënjohur shqiptare në Kroaci, Shenida Bilalli, njëherësh udhëheqëse e Shoqatës së gruas shqiptare në Kroaci. Gjatë takimit letrar librin tim, “Shqiptarët në Zvicër- 1001 pamje”, ia dhurova shoqatës së Shkrimtarëve në Suedi, regjisore , Shenida Bilallit , poetes Drita Nikoliqi- Binaj dhe parë edhe Shoqatës së Shkrimtarëve në Gjermani e në Zvicër.

( Me këtë rast po japim ca imazhe nga takimi i shkrimtarëve në Cyrih dhe manifestimi kushtuar Ditës së Flamurit në Amriswill)