Ansambli i Këngëve dhe Valleve “Drita” nga Krezlingeni i Zvicrës, mbrëm në një ambient festiv dhe me një program sa masiv aq edhe cilësor shënoi 15 vjetorin e Pavarësisë së Kosovës. Defiluan në skenë jo vetëm grupet e të rriturve dhe të vegjëlve, por nxënësit e shkollave shqipe që veprojnë në këtë anë. Në këtë manifestim mori pjesë dhe përshëndeti edhe deputetja e Kuvendit të Kosovës Dr. Albena Refki Reshitaj.
Teksti Rexhep Rifati
Fotot: Afrim Nevzadi
Në praninë e qindra mërgimtarëve nga anë të ndryshme të Zvicrës, por edhe të Austrisë e Gjermanisë, mbrëmë në Qendrën Kulturore- Sportive “Dreispitz”, të Kreuzlingent, Ansambli i Këngëve dhe Valleve “Drita” për nder të 15 vjetorit të shpalljes së Pavarësisë së Kosovës, shfaqi një program tejet të përzgjedhur e festiv, ku në skenë defiluan grupet e moshave të ndryshme që përfshijnë mbi dyzet e sa anëtarë, ndër të cilët me zërin e saj u shqua solistja më e moshuar dhe talentuar Xhemile Kryeziu. Në këtë manifestim mori pjesë dhe përshëndeti edhe deputetja e Kuvendit të Kosovës Dr. Albena Refki Reshitaj.
Programin e shpalli të hapur gazetari i RTK, Zenel Hajrizi, një dashamirë shumëvjeçar i ansamblit “Drita”, pasi që edhe kësaj radhe RTK ishte sponsor medial i kësaj ngjarje kuturore, e pastaj pikat në vazhdim i prezantoi, Valerina Myrtaj.
Do përsërit edhe me këtë rast, se derisa në Kosovë dhe trojet etnike, prej vitesh thuaja se është shuar amatorizmi muzikor, në Zvicër edhe më tej veprojnë aktivisht me dhjetëra grupe dhe ansamble, kryesisht falë punës vullnetare e të prira nga pasioni për ti dhënë shtytje dhe frymë rritës sonë kulturës në mërgatë. Në këtë kudër tash e mbi 20 vite vepron edhe Ansambli i Këngëve dhe Valleve “DRITA” që i jep një dimension spektakli thuaja se çdo manifestimi që organizohet në kuadër të festave tona kombëtare, siç ndodhi edhe ky i mbrëmshmi në kuadër të 15 vjetorit të pavarësisë së Kosovës.
Ti kthehemi pak historikut të ansamblit: Ansambli Artistik „Drita“ nga qyteti Kreuzlingenit i kantonit të Turgaut, u themelua më 23 mars të vitit 2002, kur në nismë “Drita” funksionoi si një grup relativisht i vogël që tubonte kryesisht të ri me prejardhje nga të gjitha trojet etnike, por që kishin një vullnet të rrallë. Nga koha që përcjelli aktivitetin e këtij ansambli, shihet se ai ka përjetuar një rritje si në cilësi ashtu edhe në sasi.
Ansambli “Drita” sipas kryetarit, Haradin Gashi, një veprimtarit të palodhshëm, ansambli numëron rreth 50 anëtarë aktiv, përfshi edhe kryesinë, ndërsa që në nismë u mbështet nga disa koreografë shqiptarë me përvojë she tash anëtarët e bëjnë vet këtë punë me shumë elokuencë dhe pasion. Po të mos ishte puna e madhe vullnetare, vështirë se do të funksiononin kaq gjatë kjo shoqëri që vepron në kushte tejet specifike, por që duke e shfrytëzuar zellin e talentin e fëmijëve tanë dhe përkrahjen e prindërve të tyre edhe tash që ka shkelë në dekadën e tretë, “Drita” vetëm sa e ka shtuar e zgjeruar veprimtarinë duke i përfshi edhe më të vegjlit si dhe nxënësit e shkollave shqipe në Kreuzlingen, Weinfelden dhe Erlen, të cilët i dhanë zërin e bilbilit me këngë e vallëzime.
Programi i mbrëmshëm kah fundi i tij u shndërrua në një gazmend ku edhe një pjesë epublikut iu bashkua valleve, falë këngëtarëve mysafirë, siç ishin Lirim Raci dhe Mimoza Celaj, që edhe më e ndezën atmosferën.












































