Tava e specave të mbushur është një tavë që thuhet të përgatitet më shumë në rrethin e Anamoravës, por që përdoret jashtëzakonisht nga të gjithë.
Për përgatitjen e kësaj recete nevojiten:
- 3-4 qepë të mëdha
- 1 gotë oriz
- 1kg mish i bluar
- Speca dollma
- Kripë, piper i zi, piper i kuq, majdanoz, nenexhik dhe vaj ulliri
Mënyra e përgatitjes:
Qepët i grijmë imët dhe i fërgojmë në vaj derisa të zbuten, në temperaturë jo shumë të lartë. Pastaj ia shtojmë mishin e bluar dhe përziejmë vazhdimisht, duke ia shtuar kripën, piperin e zi dhe erëzat. I lëmë të fërgohen mjaftueshëm, por jo të skuqet mishi dhe ia shtojmë orizin, të cilin më parë e kemi larë mirë. Përziejmë vazhdimisht dhe në fund ia shtojmë një lugë gjelle piper të kuq, sa të marri masa ngjyrën e nevojshme.
Ndërkohë, pasi që kemi pastruar specat dollma dhe i kemi hequr bishtin dhe farat, i marrim dhe i mbushim me masën e përgatitur me mish të bluar. Specat i rendisim në tavë të lyer më parë me gjalp, dhe i shtojmë një gotë ujë. I fusim në furrë të nngrohur paraprakisht në 250 gradë dhe i lëmë të ziejnë. Kur specat të jenë skuqur mirë nga sipër, i rrottullojmë dhe i lëmë të ziejnë akoma derisa të shterret uji dhe të skuqen specat edhe nga ana tjetër.
Ju bëftë mirë!
