Kryetari i Lidhjes Demokratike të Kosovës Isa Mustafa, ka reaguar lidhur me letrën e hapur që Albin Kurti i ka dërguar sot gjatë ditës. Kurti në letrën e tij të hapur ka kërkuar që të garojnë me një listë të përbashkët, ku numrin 1 do ta barte pikërisht Vjosa Osmani dhe ai kandidat që do të marrë më së shumti vota, ta meritojë postin e kryeministrit.
Por, mesa duket kjo nuk i ka pëlqyer Isa Mustafës, i cili ka refuzuar propozimin e Kurtit, duke thënë se LDK-ja është e hapur të lidhet marrëveshja, por vetëm me Vjosën kandidate për kryeministre.
Më poshtë gjeni të plotë postimin e Isa Mustafës në profilin e tij në facebook:
Letër drejtuar Kryetarit të Lëvizjes Vetëvendosje Z. Albin Kurti
I nderuari Kryetar i Lëvizjes Vetëvendosje, z. Albin Kurti
Gjatë muajve, javëve dhe ditëve të fundit, LDK-ja ka punuar shumë dhe hapur, për të arritur një marrëvveshje bashkëpunimi me VV-në, me qëllim që të lidhim koalicion parazgjedhor dhe për të garuar së bashku më 6 tetor.
LDK-ja me kohë e ka bërë të ditur se njeh dhe e vlerëson pritshmërinë e qyetarëve të Kosovës për këtë bashkëpunim.
LDK-ja është e hapur që marrëveshja të lidhet, nën drejtimin e kandidites sonë për kryeministre, znj. Vjosa Osmani.
Këshilli i Përgjithshëm i LDK-së e ka miratuar unanimisht kandidaturën e znj. Osmani, prandaj ajo e ka përkrahjen e plotë të LDK-së për të kryesuar listën si kandidate për kryeministre dhe për të fituar zgjedhjet.
LDK-ja është subjekti më i madh politik në Kosovë, ka besimin më të madh, ka përkrahjen më të madhe, prandaj edhe do ta udheheqë vendin.
Propozimi juaj shpie, nga gara me të tjerët, në garë ndëmjet nesh, ndërsa kjo do të dëmtonte seriozisht interesin e përbashkët.
Po ashtu, LDK-ja vlerëson se një listë pa një prijës të nominuar, është një listë pa krye dhe pa orientim të qartë.
LDK-ja shpreh gatishmërinë e plotë që të vijojë bashkëpunimin me VV-në, tani apo dhe pas zgjedhjeve dhe e konsideron atë si partner në kauzën për të shpëtuar vendin nga krimi, korrupsioni, zhvatja dhe për ta nxjerë vendin nga izolimi.
Me respekt, Isa Mustafa
