Kjo shoqatë tash me petk kulturor, që tubon 60 anëtarë moshash të ndryshme, me prejardhje nga të gjitha trojet tona etnike, veprimtarinë e saj e filloi si shoqatë humanitare për të ndihmuar me gjitha format popullatën e rrezikuar në Kosovë
Teksti e fotot: Rexhep Rifati
Shoqata Kulturore Shqiptare “Bashkimi” e Ushterit, në kantonin e Cyrihut, e cila sivjet shënon 25 vjetorin e themelimit, pikërisht më 17 Shkurt 2019 , doli para qindra mërgimtarëve në sallën e Teatrit të Ushterit me një program tejet të pasur artistik. Vetë numri i artistëve të dy grup moshave ishte një dëshmi se në këtë lokalitet jo vetëm që jetoj një komunitet i madh shqiptar tejet dinamik, por edhe aktiv në fushën e ruajtjes dhe kultivimit të trashëgimisë sonë kulturore.
Përndryshe, shoqatën “Bashkimi” ( e themeluar në vitin 1993) e cila në fillim zhvilloi një veprimtari shumë të organizuar humanitare, për dërgimin e veshmbathjeve dhe artikujve të tjerë për familjet refugjate të Kosovës në Shqipëri , e kam njohur për herë të parë këtu e 20 e sa vite më parë, kur një nga drejtuesit e saj të asaj kohe Fazli Tahiri, bashkë me një grup veprimtarësh nuk kishin të ndalur. Ai edhe tash në pension kur jeton në një komunë krejt tjetër vjen për çdo vit për të festuar me drejtuesit dhe artistët e shoqatës “Bashkimi” tash në pension edhe sot kish ardhur për të festuar me të tjerët, një kryesi po ashtu tejet aktive që punonte në mbarvajtjen e programit artistik dhe përgatitjen e ushqimeve dhe pijeve për të pranishmit.
Në këtë tubim festiv, përmes një fjale rasti aktivisti i hershëm i çështjes kombëtare , Bejtullah Tahiri, foli për rëndësinë e kësaj feste tonë shtetërore, ndërsa mësuesi Vaxhid Sejdiu mbi disa aspekte zhvillimore dhe rëndësinë që luan mësimi plotësues shqip për ruajtjen e gjuhës, e të traditës kombëtare.
Ndërsa në skenë dy grupet e valltarëve dolën me një program mjaft simpatik të kësaj shoqate që udhëhiqet nga Guximtar Alushi, me prejardhje nga Struga. Anëtaret e shoqatës “Bashkimi” në skenë defiluan me një tufë këngësh e vallesh, ku veçmas spikati grupi i fëmijëve që i dha hijeshi e freski manifestimit ,duke ngjallë emocione te të pranishmit, sidomos duke tërheq vëmendjen e moshatarëve të tyre . Në pjesën e dytë të programit me këngë popullore e folklorike vazhduan këndimin Malsori dhe Isuf Rashit.
Ndërkohë, zhvillova një bisedë të shkurtër me kryetarin e Shoqatës “Bashkimi”, Guximtar Alushi, nga i cili mësova se shoqata që si tersi ka 200 anëtarë, e që ka një kryesi prej 15 anëtarësh, është duke u profilizua nga një shoqatë humanitare në një shoqatë kulturore, me qëllim që të rinjtë dhe fëmijët ti kthehen sa më shumë që të jetë e mundur rrënjëve të prejardhjes, si dhe kulturës e traditës së të parëve dhe kështu ti shpëtojnë për aq sa është i mundur valëve të asimilimit që imponon vendi ku jetojnë e veprojnë.
Përndryshe edhe kjo shoqatë, gjegjësisht prindërit dhe anëtarët e saj kujdesen edhe për blerjen e kostumeve dhe sigurimin e lokalit e të instrumenteve.

















































